Monday 2 August 2010

Saudoza Ilidia Buka Justica Ba Mahodo Nia Lakon La hetan Too Mate


Saudoza Ilidia da silva Guterres faluk husi Saudozu Jose Amancio da Costa alias Mahodo ran kadalak ne'ebe deskonfia halakon husi Militia pro Indonesia ho TNI sira iha 1999 mate iha singapora hafoin sofre Kankro. Durante ninia moris Saudoza Ilidia buka dalan oi-oin atu hatene tuir ninia kaben nia paradeiru maibe too nia ikus kotu seidauk hetan roman justica wituan ba ninia laen ne'ebe iha Tempu Rezistencia hanesan kuadru importante ida hafoin Xanana ho Mahunu.
Saudoza Ilidia nia mate isin to'o hikas iha Dili ho aviaun silk air iha 31/07/2010 tuku 14.50 otl simu husi PM Xanana ho maioria membru Governu hamutuk ho Prezidenti da Republika ho Prezidenti PN no Prezidenti partidu Fretilin, sekretariu jeral partidu istoriku ne'e inklui forsa armadas Timor Leste ninian. Saudoza Ilida hakoi iha santa Cruz Dili, 01/08/2010.
To'o iha aeroportu Ulun bo'ot barak husi Estadu Timor Leste ba hamriik besik iha kaizaun dona Ilidia nian ne'ebe taka hela ho Bandeira Nasional hodi hakruuk ulun no liu tan ida ne'e Saudozu Mahodo nia kolega intimu Mahonu ne'ebe alijadu hakat besik ba ho ninia ai tongkat hodi hakuak kaizaun no tanis. Iha parte seluk Primeiru Ministru Xanana Gusmao kaer metin hela Saudozu Mahodo ninia inan ne'ebe tanis ba ninia feto foun nia mate. Saudozu Mahodo no Saudoza Ilidia iha oan nain tolu. Oan Primeiru Moris iha baze de apoiu no mate no agora oan mane nain rua maka moris hela.
Prezidenti da Republika DR. Jose Ramos Horta ne'ebe publikamente la aceita harii Tribunal internasional ba krime sira ne'e akontese iha pasadu ne'e mos hatudu ninia laran luak hodi ba simu mate isin Ilidia nian iha Aeroportu no akompania ba hakoi. Iha CCF Prezidenti Horta fo sentimentu kondolensia hodi no ironia liu tan Ulun Boot Timor ne'e sei barani atu buka hatene tuir Saudozu Nicolao Lobato no Mahodo ninia restu mortais.  "Ita la hatene Saudozu Nicolao Lobato ninia ruin ne'ebe. Prosesu hahu daudaun ona. Iha tempu badak ita bele hetan karik resposta. Mahodo mos ita lahatene, sirkumstansia mate oin sa? Ruin Iha ne'ebe? Maibe pelumenus nia faluk Kamarada Ilidia Guterres iha ne'e hamutuk ho ita, simu omenajen ida ne'e, "dale Prezidenti Horta iha Luru Mata.
Eis Fundador Fretilin ne'e akompania mate isin Ilidia ba too iha CCF.

No comments: