Thursday 2 December 2010

Timor Leste Sei Rekruta Tan Juventude 600 ba Sai Membru F-FDTL

Taur Matan Ruak Eis Xefe Estadu Maior das Falintil
ne'ebe daudaun ne'e hanesan Major jeneral F-FDTL
Tempo Semanal-Dili, 02.12.2010

Iha Janeiru tinan 2011 F-FDTL sei hahu halo fali rekrutamentu ba voluntariadu foin sa'e Timor oan sira atu servi ba intituisaun lutu Falintil-Forsa de Defeza Timor Leste. Tuir parte ne'ebe responsabiliza ba konkursu ida ne'e katak rekrutamentu ne'e bazeia ba lei sei simu jovens hamutuk na'in atus neen (600) ne'ebe kompostu husi vaga ofisiais na'in sia nolu resin rua (92), sarjentus atus ida lima nolu resin hitu (157) no prienxe pozisaun pracas hamutuk atus tolu lima nolu resin ida (351).

 Prezidenti de Juri ba rekrutamentu darua iha Governu AMP ninia ukun ne'e, Joao de Cortereal Araujo dehan, "Sekretariu do estadu de Defeza bazeia ba lei serisu militar no regulamentasaun da lei de servisu militar sei loke konkursu publiku atu simu jovens ka foin sa'e sira, voluntariu, feto ka mane ne'ebe ke hakarak servi iha vida Militar tuir rejime voluntariadu atu prienxe vagas atus neen.

Tuir sekretariu Estadu da Defeza, DR. Julio Tomas pinto katak ninia parte prevene ona iha proposta orsamentu ba tinan 2011 ho total milaun rua nolu resin haat husi orsamentu do Estadu. Ne'e katak pursentu tolu husi orsamentu do Estadu Timor Leste. "Orsamentu ba tinan 2011 sei uza ba sosa fardamentus no bala musan," dehan Julio Tomas Pinto.

Nia informa katak exekusaun orsamentu do estadu tinan ne'e la'o ho diak tan ba ninia parte exekuta ona osan kas hamutuk 65 pursentu tan ba seidauk halo pagamentu ba rubrika sosa karreta no almari tau kilat nian iha F-FDTL. Nia promete katak iha fulan ne'e nia laran ninia instituisaun simu ona sasan hirak ne'e maka halo tan pagamentu liu tan nune'e sei aumentu tan pursentu balun.

Nia hatutan, "prepara fardamentu ho municoeins ba F-FDTL iha prosesu rekrutamentu ba tinan oin."
Tuir DR. Pinto katak iha mos orsamentu ba kontinuasaun hari'i hotu edifisiu Polisia Militar iha Kintal bo'ot Dili no konstrusaun seluk. "Kapital dezenvolvimentu nian ita sei tau ba kontinuasaun polisia Militar i ita sei tau orsamentu ba dezenvolve kuatel treinamentu militar i kontinuasaun ba hari'i kazerna komponente naval nian iha hera Dili," esplika Julio.

Iha deklarasaun ne'e DR. Pinto mos informa katak sei hadia liu tan ekipamentu militar ba Forsa Komando Marina Falintil-Forsa de Defeza Timor Leste. "Iha orsamentu beins i servisu, kapital minor ita sei tau tan ba sosa lanca rapidas ba komponente naval para utitiliza, pasukan khusu marina nian ," dehan Julio pinto

F-FDTL ne'ebe lakon ninia membru sorin iha 2006 ne'e, prienxe hikas ona sorin hafoin de prosesu rekrutamentu foin liu ba.
Iha parte seluk populasaun hahi planeamentu maka monta husi instituisaun Defeza Timor Leste tan ba tuir sira katak tempu duni ona atu iha rekrutamentu agora hodi nune'e veteranus Falintil sira iha F-FDTL sei hatudu hela izemplu nasionalizmu ba forsa foin sa'e ne'ebe sei simu tonkat responsabilidade iha instituisaun ne'e.
"Ha'u konkorda ho hanoin sira husi ulun bo'ot Defeza ninian tan atu dezenvolve no hametin F-FDTL ne'e presiza ona hala'o nafatin rekrutamentu nafatin i husu ba maluk veteranus das Falintil atu rai hela ba jovens sira ne'e espiritu de sakrifisiu ba nasaun no povu maka sira iha durante tinan rua nolu resin haat nian laran," Armando Freitas komunidade ida hela iha Dili.
Kleur ga lalais eis gerilleiru FALINTIL sira sei tama iha faze de reforma tan ba barak liu ninia idade mos avansa liu ona no tuir planu 2020 F-FDTL sei iha militar hamutuk rihun tolu. (TS).

No comments: