Monday 17 January 2011

Jornalista TVTL Tama Fali Servisu la Signifika Problema Remata no Governu indika Eis Ministru ida atu Troka DR. Espedito

Tempo Semanal-Dili, 17.01.2011

Kameramen TVTL halao hela kna'ar iha PN
Iha loron 12/01-14/01 tinan ne’e hakna’ar nain TVTL halo greve hodi la hala’o kovertura ba notisias hanesan jestu protest ida kontra Prezidenti Interinu konsellu administrasaun Radio Televizaun Timor Leste Empreza Publika (RTTL-EP). Maibe hafoin liu husi hasoru malu ho membru funsaun publikas no konkordansia entre jornalista TVTL hahu loron segunda feira (17/01) sira hahu tama fali servisu hanesan bain-bain.

Mosu espekulasaun oioin hasiru jornalista sira ne’e no ate balun dehan tan ba hetan prezaun husi Governu maibe Alberto Alves hanesan lia na’in ba asaun protesta ne’e dehan, “entre ami rasik hetan konkordansia atu hala’o hikas fali ami nia servisu tan ba haree ba ointerese publiku la’os tan ba situasaun Sr. Espedito dias Ximenes ninian. Maibe ami sei kontinua nafatin ho ami nia ezijensia kona ba rezigna aan Sr. Espedito Dias Ximenes ninian hanesan Prezidenti interinu konsellu Administrasaun RTTL-EP.”

Tuir Porta Voz jornalista no funsionariu TVTL liu nain lima nolu resin ne’e katak sira nia ezijensia maka nafatin, “ami husu governu atu nomeia ho lalais prezidenti defentivu konsellu administrasaun RTTL-EP no ativa lalais konsellu de opiniaun ho konsellu de Fiskal.”

Wainhira husu katak karik funsionariu TVTL hetaan presaun husi parte ruma ne’e maka sira hakarak tama hikas servisu maibe alberto dala ida tan rezeita. “Ami la hetaan presaun husi see see deit no ami mos la hakidu ba ameasa sira. Ami hahu tama hikas servisu tan ba interese publiku,” dehan Alberto ho lian ho tone triste.

Maibe Albero Alves dehan ninia parte preparado atu halo fali asaun greve iha tempu badak ninia laran wainhira Governu seidauk nomeia Prezidenti board defenetivu hodi troka DR. Espedito. “Sr. Espedito rasik dehan ona baa mi nia reprezentante katak nia sei rezigna aan iha fin do mes ka inisiu fevereiru. Maibe se nia la foo resposta rezigansaun ninia aan maka ami sei kontinua fali ho ami nia asaun protesta too hetaan solusaun,” haktuir Alves.

Kadeira manas prezidenti konsellu administrasaun RTTL ne’e manas duni tan ba sempre mosu hadau malu. Iha momentu ida DR. Espedito Dias Ximenes konsege hadau husi Sr. Vergilho Guterres ne’ebe konsege resolve liu husi meja verde hodi halo estadu RTTL selu kompensasau ba parte Sr. Vergilho ninian. Hafoin de DR. Espedito ninia mandatu remata durante tinan rua nia laran konsellu administrasaun la iha prezidenti defentivu maibe DR. Espedito hanesan prezidenti interinu.

“Ami nain lima ne’ebe tama konsellu administarasaun ne’e hetaan nomeasasaun politik. Kompetensia atu nomeia no hasai ne’e kompentensia orgaun do estadu sira ninian, ne’ebe problema falta kamera, kareta la iha ne’e loloos sira husu responsabilidade ba diretur TVTL, la’os mai fali board,” dehan DR. Espedito dias Ximenes ba jornal ne’e iha sexta (14/01).

Membru Konsellu administrasaun RTTL-EP kompostu husi ema sira ne'ebe nomeia husi Giovernu, Parlamentu, Prezidenti da Republika no reprezentante husi Radio no Televizaun. Iha loron 06/12/2010, Jose Luis de Oliviera, membru konsellu administrasaun RTTL maka nomeia husi Prezidenti da Republika hato'o keixa ida hodi kontra maka'er ukun interinu iha konsellu administrasaun RTTL-EP maka haruka mos ho anexu dokumentus balun hanesan kuitansia uzu de mina ba kareta 02-382 G, kuitansi selu kustu telemovel, no dokumentus seluk hodi reforsa ninia allegasaun

. "Medidas ne'e (hato'o keixa) ha'u deside atu halo, tan ba la auguenta ho kondisaun ne'ebe la'o iha RTTL,"dekreta iha surat ne'ebe haruka ba Sekretariu do Estadu Konsellu dos Ministru ne'e.

Tuir fontes jornal ne’e katak iha governu nia laran hateten katak governu hahu hanoin daudaun candidates balun atu troka DR. Espedito dias Ximenes iha tempu badak nia laran. Kandidatu ne'ebe naran sai forte liu atu troka DR. Espedito dias Ximenes maka eis Ministru dezenvolvimentu iha Governasaun dahuluk hafoin de restaurasaun independensia TL. Tuir Fontes jornal ne'e iha partidu Fretilin ninia laran dehan eis ministru ne'e maka uluk propoin DR. Espedito dias Ximenes uluk sai hanesan membru board hodi troka Sr. Vergilho Guterres.

Iha semana kotuk, parte balun konsege mensiona naran DR. Abel Ximenes ne'ebe daudaun ne'e sai hanesan membru ba komisaun Funsaun Publiku atu bele leva hikas pasta Prezidenti konsellu administrasaun RTTL-EP to'o 2012.(TS)

1 comment:

Anonymous said...

Jornalista TVTL balun dehan katak mesmu sira para ona greve maibe tuntutan atu Expedito resigna an lao nafatin. tebes ka lae? Keta halo be manas hanesan manu nia ten deit ( Panas-panas tai ayam). Lakon tiha tempu ho energia lubuk maibne hasil laiha..... moe fali pa..!!!!!!