Sunday 6 March 2011

PM Xanana Kuran Fiar Ba Zacarias Foo Fiar ba Emilia

Tempo Semanal-Dili, 05.03.2011


Di'ak liu lakon osan duke lakon konfiansa husi ita nia superior. Malisan husi lia dolin ida ne'e maka kona hela ba ukun sira iha nasaun ne'e ninian. Tuir fontes jornal ne'e iha IV Governu AMP nia laran dehan tan PM laran la metin ba Ministru Zacarias ne'e maka hodi tula todan ne'e ba Ministra Finansas. "Tuir estatutu organika konsellu dos Ministru ninian ne'ebe loos ne'e maka wainhira Primeiru Ministru la iha fatin sei entrega kna'ar organiza atividade governasaun ba ninia vice no bainhira Vice iha problema sei entrega ba ema ne'ebe numeru tuir kedan mak Ministru Negosiu estranjeiru," informa fontes ne'ebe husu atu labele publika ninia naran.

Bu'at ida ne'e maka akontese duni wainhira Primeiru Ministru husik hela Timor Leste iha meadu fulan Fevereiru ba USA entrega kna'ar organiza atividade Governasaun IV Governu  ninian ba nia vice. Maibe antes Primeiru Ministru ne'e fila fali mai Timor Leste vice PM, DR. Jose Luis Guterres rasik tenke ba marka prezenca iha tribunal iha loron 02/03/2011. Nune'e duni iha loron 28/02/2011, iha Havana, PM Xanana haruka surat ida ba Prezidenti da Republika hodi informa situasaun ne'ebe ninia vice PM enfrenta no foti DRA. Emilia Pires ba koordenadora atividade governasaun to'o PM Xanana fila hikas mai nia nasaun.

Ironia uitoan wainhira fontes ne'e dehan Ministra Finansas mos iha momentu ne'eba hala'o hela viajen ba ida ba estranjeiru. "Ministra Finansas iha hela vizita ida ba Australia no atu ba tuir enkontru importante ida husi Banku Mundial ninian iha Malasya maibe PM husu atu nia fila kedan mai TL hodi simu responsabilidade refere," dehan fontes ne'e.

Iha IV Governu konstitusional ninia laran Ministra finansas hanesan ema okupa numeru haat hafoin, PM, Vice PM, Ministru Negosiu Estranjeiru.

Nia hatutan katak, "tuir estrutura loloos ne'e MNE mak hetaan fiar PM ninian maibe tan ba problema krize de konfiansa PM ba ministru Zacarias ne'e maka PM haruka Ministra Finansas fila mai koordena Governu nia atividades."

Iha parte seluk Ministru Negosiu Estranjeiru ne'ebe iha hela Jakarta ba jornal ne'e nia informa liu husi sms ho diplomasia koko hamenus rumores ne'e. "ha'u iha jakarta lidera delegasaun ida boot besik 40 pessos husi Ministeiru hotu atu mai partisipa iha 5th joint ministerial Commission meeting, atu prepara mos vizita ofisial Senhor Primeiru Ministro nian ne'ebe sei hala'o iha 21 e 22 de Marco ba Indonesia, no entrega karta aplikasaun TL nian ba ASEAM," esplika iha SMS MNE ninian ne'ebe jornal ne'e simu (04/0).

Liu tan Zacarias dehan, "vizita ne'e importante no istoriko ba TL. ne'e duni ita boot sira maka tetu de'it ba. Se ha'u nia vizita ne'e maka importante ka buat seluk ne'ebe ema ko'alia."

Ministru Negosiu Estranjeiru ne'e tenta soke dehan, "PM rasik maka autoriza ha'u ba hala'o vizita ne'e."

Dezde tinan kotuk Primeiru Ministru Kay Rala Xanana Gusmao ho Ministru Negosiu Estranjeiru DR. Zacarias Albano da Costa ninia relasaun tau iha kestaun dezde polimika ameasa rezignasaun SMS husi MNE Zacarias ba PM Xanana iha abril tinan kotuk. Iha momentu ne'eba odamatan konsellu de Ministru ba dahuluk nakloke ba jornalista sira hodi asiste julgamentu rezignasaun SMS.

Iha julgamentu mini Konsellu dos Ministru ne'e PM Xanana hatudu liman ba DR. Zacarias hodi dehan ninia ministru ne'e halo eru no ministru Zacarias promete atu husu investigasaun ba ema sira ne'ebe hasai ninia sms ba publiku maibe to'o ohin seidauk rona iis ruma. (TS).

1 comment:

Anonymous said...

Hau hanoim, TEmpo lakon credibilitas tomak wainhira halo fali interpretasaum ba faktus politikus. Jornalistas sira tenki fo deit faktus, husik ba publiku mak halo julgamentu no interpretasaum. Mas ema horu hatene ona se mk Jopse Belo, ho nia team iha Tempu Semanal.