PARTE IV; 20 Agosto loron Falintil Se maka fundador Falintil?

8. Influencias ne’ebe obriga eis tropas atu halo moris forcas armadas ida

Influensia husi liur

Caetano Guterres Maulori

8.a).Influensia husi liur-Hare ba istoria uluk nia ne’ebe iha terus oi oin no susar oi oin ne’ebe ita sente rasik no hare rasik, iha kolonialismo nia okos. Oin sa mala’e xefe do posto sira, sipaios sira, liurai obriga ita nia avo sira, inan aman sira halo servisu forsados, selu imposto no auxiliar ne’ebe la simu osan durante semana ida, sistema troka malu no servisu saugati de’it la simu buat ida maibe simu maka rota no polmatoriu etc. Tenke halo fornecimento obrigatorio, atu foo manu tolun, mano oan, bibi no fahi oan leitão etc.(Hakerek badak deit, resumido).

 8.b).Aumenta tan ho membros no liders eis UDT sira nian ne’ebe mai husi grupos sira ne’ebe temi tiha ona iha leten ba, ne’ebe hamutuk ho mala’e mutin, hanehan ita nia povo, aman inan, avo no bei ala sira, ne’ebe seidauk kleur ida. Ita barak assiste rasik, hare rasik no sente rasik, ho tan  politika eis Partido UDT, ne’ebe hakarak atu federasaun nafatin ho portugal etc. “Iha ne’e hakerek nain ko’alia no temi mistisu nia naran maibe la’os mistisu hotu, temi liurai sira naran maibe la’os liurai hotu, tan ba sira barak mos sai nu’udar militantes, liders no fundadores ASDT nian ikus mai FRETILIN nian etc”.(Hakerek badak deit, resumido).

8.c).Lideres UDT balun ne’ebe iha influencia bo’ot, iha relasaun di’ak tebtebes ho mala’e mutin sira ne’ebe sei ativu iha militar portugues nia laran, i iha sira nia sorumutu ne’ebe halo hosi kotu kotuk no suba subar, aumenta tan iha sira nia ko’alia sira nebe hateten a’at los ba FRETILIN no ba povo timor etc.etc.(Hakerek badak, resumido).

8.d). influencia nebe mai husi laran-Iha Companhia laran tropas mala’e sira no tropas timor oan sira hare malu matan la mos, dala ruma to’o baku malu, tropas mala’e mutin sira trata no hateten a’at ba povo timor no FRETILIN sira, dehan katak daun ida mos seidauk hatene, haris an mos la hatene, ita nia inan feton, sira dehan dois deit kami mos hakarak atu ukun rasik an etc.etc.(Hakerek badak dit, resumido).

8.e). Foo aihan funu nia ba eis tropas sira, aihan ne’ebe bolu “ração de combate” aihan funu nia ne’ebe so bele han iha oras tempu funu nian, mala’e sira foo ordem atu fo ba eis tropas sira iha oras han meu dia nian no kalan nian, dala 2 iha semana ida nia laran, ho razaun katak, aihan sira ne’e nia prazo atu besik liu ona ne’e duni tenke han tiha para labele estraga, aihan sira ne’e balun tula lori sai kalan dehan atu ba so’e, maibe tropas sira ne’ebe akompanha aihan atu ba so’e ne’e so mala’e mutin de’it maka tuir, hahalok sira ne’e halo ami eis tropas timor oan deskonfia liu tan mala’e sira etc.(Hakerek badak deit, resumido).

8.f) .fakar kilat musan no lakon perkutores kilat foun nian, mala’e sira haruka ba fakar  kilat musan ho kaixote atus ba atus ba tasi laran, sira dehan deit fakar ba tasi laran maibe ami deskonfia katak sira subar iha fatin seluk ou entrega ba ema ruma, no lakon perkutores kilat foun nian ne’ebe uluk ami bolu deit G4, maibe ida ne’e so ami deskobre wainhira iha kontra golpe ona, ne’ebe ami loke kaixote foun sira nee mesak kilat mamuk laiha perkutores, ne’e duni tiru ladiak. Armazem kilat foun sira ne’e mala’e sira deit maka halo konta. Ne’e duni iha DSM armazem material funu iha 2, ida hakerek nain ho Sr. Germano Lobo (sei moris hanorin eskola iha Kamea) ne’ebe halo konta, ida seluk mala’e sira maka halo konta. Maibe armazem sira mak mala’e halo konta ne’e laiha problema ida, wainhira ami hakarak desarma sira to’o oras kontra golpe nian, tamba hakerek nain mos iha xave kopia nian ida etc.(Hakerek badak deit, resumido).

9. Saida maka estimula ami nia espírito no foo aten brani ba ami

Iha estimulantes lubun ida hanesan motor ne’ebe dudu, doko no halo manas ami nia espirito nacionalismo, foo aten brani mai ami, atu hakat la tauk, la nakdoko odi hakilar “mate ga moris ukun rasik an.” Estimulantes sira ne’e maka hanesan politika ukun rasik aan ne’ebe FRETILIN defende, hino Fretilin nian, Foho Ramelau, ba hakerek nain iha tan ida maka hanesan versos sobre espirito nacionalismo nia, ne’ebe Kay Rala Xanana Gusmao hakerek iha tempo ne’eba. Hakerek nain sei hanoin “estrofe ida, baris dalam sebuah poesi”ne’ebe dehan nune’e, “que por este lado do levante, tremule a bandeira do meu Timor” ne’ebe mais ou menos dehan “iha loron matan sa’e hare dahuluk, ha’u nia bandeira bele namlele iha nia ai rin leten!” Ba ema ne’ebe moris di’ak ona, kala la’e maibe ba ema ne’ebe kiak no moris iha terus no susar nia laran, politika FRETILIN nia ho hino FOHO RAMELAU, ne’e doko tebes duni ita hanesan maninga ida iha momento ida ne’eba etc. (Hakerek badak deit, resumido).

Situasaun politika no buat selu seluk obriga eis tropas atu hamoris lalais forcas armadas de Timor-Leste nian

 10. Reunião Klandestina iha Mota Ulun-Bazeia ba akontecimentus sira iha leten. Koordenadores eis tropas portugueses sira komesa deskonfia maka’as liu tan katak mala’e sira iha planu sekretu ida maka’as ne’ebe obriga para eis tropas atu halo kontra plano ida urgente tamba iha aproximasaun “Pendekatan” maka’as  teb tebes, maibe sekreta husi oficiais Portugueses sira ba partido UDT, kuandu iha oras intervalo servisu nian wainhira ami ko’alia kona ba politika ukun rasik aan nian, mala’e sira ne’ebe kabu ho soldado sira no sergentus balun la mete buat ida, maibe sira sergentus no oficiais barak hanesan fali foo sira nia apoio ba UDT mos, i ami relasiona ho akontesimentus selu-seluk ami deskonfiansa ba mala’e sira makas liu tan. Entaun ami deside atu halo sorumutu sekreto ida iha Mota Ulun, hodi foo hanoin ba malu katak iha exigencia urjente ida atu halo moris  Forças Armadas Timor-Leste ne’ebe ami sempre ko’alia ona. Tan ba hahalok ne’ebe mala’e sira hatudu, ne’e foo sinais maka’as  katak mala’e sira sei hamutuk duni ho partido eis UDT i ita nia luta atu ukun rasik aan nia sei hasoru teri netik oioin. Ne’e duni Forças Armadas ida urgente teb tebes tenke hamoris, lalais kedas ona etc!.(Hakerek badak deit, resumido).

11.FORÇAS ARMADAS DA DEFESA DO POVO MAUBERE- Depois de sorumutu sekreto iha mota ulun. Entaun hakerek nain ba informa ba Sr. Rogerio Lobato hanesan ami nia komandante, objektivu principal maka atu hala’o ajitasaun no propaganda kona  politika FRETILIN nian iha Companhia ida idak nia laran tenke hala’o maka’as liu tan. Ami hili tiha kedas ona katak wainhira forca ne’e formado ona, Rogerio maka sei sai ami nia komandante, hanesan koalia tiha ona iha pontus sira iha leten ba, tan ba ne’e hakerek nain ba ezije ba Rogerio katak  iha ona necesidade urjente teb tebes atu forma kedas ona Forças ida ne’ebe ami sempre koalia. Entaun Sr. Rogerio Lobato aceita kedas e nia dehan “forças nebe ita atu forma ne’e sei foo naran, FORÇAS ARMADAS DA DEFESA DO POVO MAUBERE!”. Maibe  forças nia naran ne’e seidauk foo sai ba kordenadores sira seluk, tamba ami nia futuro komandante Rogerio Lobato nia hakarak mos katak naran forças armadas ne’e tenke segredo lai, labele foo sai kedas. Ne’e duni, naran ne’e Rogerio Lobato maka fo! “ FALINTIL ne’e transformasaun husi naran Forças Armadas da Defesa do Povo Maubere ba Forças Armadas da Libertação Nacional  de Timor-Leste FALINTIL etc”.(Hakerek badak deit, resumido).

12.Sorumutu iha Mota Ulun malae sira deskobre- Kala iha agente secreto ou mahu malae nia ida, iha ami nia le’et i informa tiha ona ba malae sira katak ami halu reuniaun secreta ida iha Mota Ulun, Nune Ami nia sorumutu klandestina iha mota ulun nee ema deskobre tiha, i etaun ami hotu hein deit ona, atu malae bolu ami ba iha tribunal militar atu kastigo ami ou halu saida los ami la hatene, iha memento ida neba hakerek nain deskonfia ona katak malae sira sei la bolu ema hotu, maibe sei bolu deit elementos “ da Comissão do Exclarecimentos do Bem Estar da Unidade CEBEU” atu responde ba acontecimento ida nee etc.(Hakerek badak deit, resumido).

13. Reuniaun bolu atensaun nian iha Comp. Des. De Engenharia-Liu tiha, mais ou menos semana ida, sorumutu klandestina iha Mota Ulun nian, komando Territorial Independente de Timor (CTIT) “ Ne’e naran Companhia hot hotu mala’e mutin nian iha Timor”, konvoka reuniaun ho elementus CEBEU “Comissão de Esclarecimento do Bem Estar da Unidade”, ne’e komisaun ida ne’ebe hala’o no supervisiona, rezolve problemas hot hotu nebe kona ba soldados sira nia moris loron loron nian, iha Companhia ida nia laran. Komisaun ne’e harii depois de 25 de Abril, atu sai membro komisaun ne’e tenke husi elisaun demokratica, nia periodo fulan tolu fulan tolu. Hakerek nain ba representa kompanhia Destacamento Serviço Material(DSM) nian, tan ba hakerek nain mos hanesan membro CEBEU, reeleito dala 4, husi kompanhia DSM nian, iha reuniaun ne’e  Major Jonatas maka preside meza. Iha reniaun nee komando CTIT foo sala ba elementus sira CEBEU kompanhia hot hotu nian,  iha komando Territorial Independente de Timor CTIT, hodi hasai desizaun ida katak sorumutu klandestina iha Mota Ulun ne’e, CEBEU maka sala, tanba CEBEU nia servisu la efektivu no la diak etc.(Hakerek badak deit, resumido).

13.a).Debate ho laran manas too tuku meza ba malu-molok rona kulpa ne’ebe mala’e tau todan ba membros CEBEU sira, durante reuniaun iha Companhia de Engenharia nee. Ema hot hotu nonok simu de’it maibe hakerek nain la simu, hodi foti liman no ko’alia ba Major Jonatas ho lian maka’as. Momento ne’eba ita la tauk tiha ona buat ida, laran metin los ba politika FRETILIN nian katak Timor-Leste ne’e sei Ukun rasik aan duni, ne’e be atu kastigu ga, saida de’it ita la tauk tiha ona. Politika ukun rasik aan nian ne’e hanesan los maninga ida ne’ebe halo ita tu’ur la metin. Hatan ba Major katak CEBEU la sala, tan ba wainhira kommando CTIT nian iha planu ruma, nunka fo sai ba CEBEU para nune’e, CEBEU bele esklarece ba soldados sira sobre komando nia programa, maibe tan ba QG halo buat ruma ne’ebe halo iha kompanhia nia laran ne’e unilateral de’it i nunka fo konsiderasaun ba CEBEU no nunka informa sobre aktividades sira ne’ebe komando do CTIT hala’o, tamba nee duni CEBEU labele responsabiliza ba reuniaun klandestina iha Mota Ulun. Hakerek nain hateten tan ba Major Jonatas katak demokracia seidauk to’o iha Timor, sei iha nafatin restus sistema ditadura nian. Entaun sira retira tiha fali kondenasaun ne’ebe mala’e sira foo ba CEBEU etc. (Hakerek badak deit, resumido).

13.b).Malae hari Comissão de Restruturação de vencimentos-Mala’e mutin sira hare ba katak, maske maluk eis tropas sira la ko’alia  maibe psikololojikamente sira hare katak eis tropas naturais sira deskontente teb tebes ho mala’e sira, tan ba mala’e sira hare ba ema hotu oin suar los, taa la han. Eis tropas Timor oan sira ko’alia maka’as iha kotuk ne’ebe ita rona isin fulun hamriik. Sira balun ko’alia hanesan atu ameasa de’it malae sira, situasaun atu deskontrolado ona, ran manas espirito de revolta maka’as liu tan. Entaun Major Jonatas foo sinal para hot hotu iha diciplina, entaun sira hotu nonok. Major, ko’alia katak depois de 25 de Abril CTIT hanoin ona atu hari komissaun ida naran Comissão de Restruturação de Vencimentus, atu bele estuda hodi foti vencimentos eis tropas sira nian, “i se maka servisu iha Comissão ne’e nia vencimentos boot liu tan ne’e parece nu’udar taktika ida atu mala’e sira bele konkista fali simpatia eis tropas karik.” I iha loron ida ne’eba duni, mala’e sira hili hakerek nain hanesan membru iha komissaun ne’e nia laran. Komissaun ne’e funsiona iha QG laran maibe hakerek nain ba de’it aijuda servisu ne’eba wainhira loron enkontru nian, maibe hela nafatin iha kompanhia DSM nia laran no halo konta nafatin material funu nia etc.(Hakerek badak deit, resumido).

13.c).Moris UNETIM ho LESVALTE descontentamento iha Unidades-Juventude estudantil sira mos komesa halo moris sira organizasaun balun ne’ebe ita hotu hatene nanis ona. Ida UNETIM hosi Fretilin no Lesvalte husi UDT. Sira mos provoka malu dala ruma too baku malu, iha Companhia nia laran. Ami ho mala’e mutin sira mos hare malu la diak ona. Deskontentamentu aumenta loron ba loron, iha Comp. DSM nia laran ami baku malu too uma han fatin nia rahun. Kalan wainhira ami sai, ami labele la’o mesak maibe tenke ho grupos, nune’e mos mala’e sira. Kabo, Miguel da Costa ho Ponciano sira sai ho eis tropas pelotaun ida ho kilat. Sira sai husi QG halo manifestasaun iha Dili laran. Iha ginasio mala’e sira komesa baku Sr. Germano no kolega selu seluk to’o besik mate, timor oan ho malae ameasa malu halo situasaun manas ba beibeik. Iha ospital militar iha Lahane, hakerek nain ho malae policia militar sira baku malu, too armario aimoruk no sasan barak rahun hotu. Sr. Albino de Loudes maka enfermeiro dia iha loron ida ne’eba, tan ba malae sira ne’e la husik ami sintoniza programa FRETILIN nia husi radio( Enfermeiro Albino Lourdes sei Moris fila hosi ona Portugal agora hela iha Dili). Entaun akontecimentos sira ne’e foo vantazen bo’ot liu tan para ami koordenadores sira bele usa hodi halo ajitasaun no propaganda ba ami nia maluk eis tropas sira seluk ne’ebe ladun ativu iha ami nia sorumutu klandestina sira. Ho akontecimentos sira ne’e ami bele halo sira seluk nia espirito nacionalistas sai manas liu tan atu bele revolta. Ami nia espirito e anxia atu forma forças Armadas da Defesa do Povo Maubere maka’as liu tan manas liu tan etc!.(Hakerek badak deit, resumido).

13.d).Companhia DSM balide hala’o ajitasaun radikal hodi canta FOHO RAMELAU

Atu halo ajitasaun hodi doko no hamanas espirito nacionalista, eis tropas iha kompanhia selu-seluk nia laran no mos ba juventude sira ne’ebe indiferente hela ba situasaun politika ne’ebe la’o dadaun iha momentu ida ne’eba, ami husi komp. Destacamento do Serviço Material (DSM), iha estrategia radikal ida, foo volta iha cidade Dili laran ho kareta militar boot, hatais farda militar kompletu hodi kanta Hino da FRETILIN Foho Ramelau. Dala ruma hakerek nain maka dirige, dala balun hakerek nain nia kolaboradores sira hanesan: Eis komandante, António da Costa alias Terra Bulak, eis komandante, Pedro Braga alias Piter, eis komandante Rafael Cabral alias Laloran, eis komandante Germano Lobo alias Maulemo ho João da Costa, oras ne’e sira hotu sei moris, hela iha Dili, maka dirije ou komanda. Ami mos iha doador ida ne’ebe fo aijuda makas ba ami, wainhira ami iha oras intervalu nian iha tuku 10 ami kostume para servisu hodi han buat ruma, iha momentu ami hotu halibur malu iha bar dos soldados atu hemu no han buat ruma, iha momentu ne’eba maka ami nia doador ne’e selu cerveja ba ami hotu hemu no deskuti malu sobre politika, wainhira ami ba hili ai maran ba dapur entaun ami nia doador ne’e foo osan ba ami atu sosa serveja no sosa bibi, hemu kaur malu ho tua mutin depois ami fila mai ohdi foo volta iha Dili laran hodi Canta FOHO RAMELAU, ami doador ne’e simpatizante boot ba FRETILIN, nia naran maka Sr. Sergento Oliveira, sei moris hela iha Dili. Ami nia espirito e ansia atu forma Forças Armadas da Defesa do Povo Maubere, makas liu tan manas liu tan etc!.(Hakerek badak deit, resumido).